اسلام آباد۔18فروری(اے پی پی)سیاحت انسانی فطرت دے عین مطابق اتے علم وفضل ودھاوݨ دی وجہ سمجھدی ویندی اے، جگ آڄوکے دور اچ سیاحت نال سرمایہ کاری و معیشت کوں تکڑا کرݨ دی ریت ودھدی پئی اے، امریکا ایندے اچ سب تو اڳو اے جیندی سیاحت نال کمائی ݙو کھرب ڈالر اے۔ مالدیپ جھیں چھوٹے ملک دا خرچ ہی سیاحت نال چلدے اتے او 2.7 ارب ڈالر سالانہ کمیندے۔ آکھیا ونڄ سڳدے جو سیاحت کہیں وی ریاست دے اتے غیر ملکی زرمبادلہ کماوݨ دا وݙا ذریعہ اے بھل پاکستان چنڳے ماحول اتے موسماں دے باوجود صرف ڳھٹ وسائل پاروں ایں شعبے اچ پچھو اے۔ پاکستان دا ہر خطہ سیاحتی ڄاہیں توں مالا مال اے، بھاویں کشمیر ہووے، شمالی برف پوش چوٹیاں، تھر اتے تھل دے صحرا، ساحل سمندر، بلوچتسان دے سنگلاخ پہاڑ، پنجاب دے دریا یا خیبر پختونخوا دے سوھݨے نظارے، پاکستان اچ سیاحت دی وݙی صلاحت اے جیکوں استعمال کرݨ کیتے اڄوکی حکومت ودھ وسائل لیندی پئی اے اتے ایہو وزیراعظم عمران خان دا ویژن جو ملک کون سیاحتی شعبے اچ خود کفیل بݨایا ونڄے۔ ایندے کیتے وزیر اعظم سیاحت کیتے حکومتی ترجیحات توڑ پچاوݨ کیتے اعلیٰ سطح قومی رابطہ کمیٹی برائے سیاحت بݨائی اے جیڑھی پورے ملک اچ سیاحت دی ترقی کیتے قابل عمل تجویزاں ݙیسی۔
پنجاب اچ سیاحت دی ترقی کیتے انڄھ محکمہ بݨا ݙتا ڳئے،محکمے دے 3 شعبے ٹورازم ڈویلپمنٹ کارپوریشن آف پنجاب(ٹی ڈی سی پی)،آرکیالوجی ڈائریکٹوریٹ اتے ٹورسٹ سروسز اہم کم کریندے پین۔ ساحتی مقامات دی بحالی تھیندی پئی اے اتے سیاحؤاں دی تعداد روز ݙیاہڑی ودھݨ پاکستان دے سڄاکے مستقبل دی نوید اے۔ ٹی ڈی سی پی کئی غیر معروف جاہیں کوں دلکش سیاحتی مراکز اچ وٹا ݙتے، اٹھ نویں سیاحتی مقامات دی سنڄاݨ کیتی ڳئی اے ایندے اچ کوٹلی ستیاں، چکوال، خوشاب، کوہ سلیمان، فورٹ منرو اتے کالا باغ میانوالی تے ترقیاتی کم شروع اے۔
مذہبی سیاحت اتے تاریخی سیاحت دی حوصلہ افزائی تھیندی پئی اے، محکمے پنجاب دی پہلی سیاحتی پالیسی منظور کرائی اے جیندے تے عملدرآمد شروع تھی ڳئے، وزیر اعلیٰ پنجاب دی کوشش نال پنجاب اچ سیاحت دا شعبہ ہک منافع بخش اتے معاشی ترقی دا تھمبا منیا ویندا پئے جیندے کیتے عالمی بنک وی ہتھ ونݙیندا پئے اتے نجی شعبہ کوں وی نال رکھیا ڳئے۔ شالامارباغ، شاہی قلعہ، روہتاس قلعہ، ٹیکسلا عجائب گھر یونیسکو دی فہرستِ دا حصہ ہین۔ مری دا رش مکاوݨ کیتے نال کوٹلی ستیاں اچ نڑھ کہوٹہ دے علاقے اچ سیاھتی مقام بݨدا پئے۔
ڈی جی خان اچں کوہ سلیمان دے علاقہ فورٹ منرو، خوشاب دی وادی سون تے کم جاری اے۔ پنجاب اچ محکمہ اوقاف نال مذہبی سیاحت کیتے ننکانہ صاحب، سچاسودا‘ماناوالہ‘کوٹ مٹھن اتے مریم آباد اچ سڑکاں بݨدیاں پین۔ ایویں ہی پنجاب اچ آرکیالوجی ڈائریکٹوریٹ ثقافتی ورثہ دی حفاظت، بحالی اتے تفریح کیتے 13 مختلف ثقافتی جاہیں جیوں، ہرن مینار، شالامار باغ، جہانگیر دا مقبرہ، نورجہاں دا مقبرہ، ہڑپہ، ٹیکسلا دا عجائب گھر اتے مغل گارڈن اچ ایلومینیشن منصوبہ شروع کیتے ڄݙاں جو سیاحتی مقامات تے ہارٹیکلچر کوں وی ودھایا ویندا پئے۔
ٹورسٹ سروسز‘ٹریولز ایجنسی اتے ہوٹلز رجسٹریشن کیتے آن لائن سروسز شروع کیتن۔ سیکرٹری سیاحت پنجاب موجب صوبے اچ سیاحت کیتے 128 سکیماں تے کم تھیندا پئے ایندے اچ 12 سکیماں مکمل ہین۔ ٹیکسلا اتے ہڑپہ اچ عجائب گھراں نال آڈیٹوریم بݨائے ڳین۔ گجرات میوزیم اتے کلر کہار میوزیم بحال تھین۔ جام پور ڈی جی خان اچ بدھ مت تہذیب دے آثار، قیمتی نوادرات ملین۔ پبلک پرائیویٹ پارٹنرشپ دے تحت نجی خےبط نال کئی ایم او یو تھین۔ جیندا مقصد معیاری سہولتاں، سرمایہ کاری، سیاحت بارے جدید آن لائن کورسز کراوݨ اے۔
سیاحتی مقامات تے کمپیوٹرائزڈ ٹکٹ نظام نال آمدن ودھی اے۔ پتریاٹہ اچ چیئر لفٹ، سفاری ٹرین اتے کیبل کار محکمہ دے مناسب ریونیو دا وݙا ذریعہ اے۔ چولستان اچ عالمی شہرت یافتہ چولستان جیپ ریلی دی کامیابی محکمہ دی محنت دا ثبوت اے، ایویں قلعہ ڈیراوڑ، مظفر گڑھ تھل جیپ ریلی، پر رونق تفریڄ دا سامان بݨ ڳین۔ اتھاں سیاحواں کوں مقامی مصنوعات، روائتی کھاوݨیا اتے علاقائی ملبوسات دے نال نال ریتی رواڄ نال آگاہی تھیندی اے۔
لاہور دے بعد راولپنڈی/اسلام آباد اچ ڈبل ڈیکر بساں چلدیاں پین اتے ہݨ بہاولپور اچ ڈبل ڈیکر بساں چل ویسن۔ صوبے اچ 179 ریسٹ ہاوسز کوں عام لوکاں کیتے کھولیا ڳئے۔ ٹورسٹ سروسز کیتے ملتان، فیصل آباد اتے راولپنڈی اچ 3 ریجنل آفسز بݨائے ڳین۔ پنجاب دے سارے تاریخی اتے سیاحتی مقامات دی فہرست، تصاویر ویڈیوز، ڈاکومنٹریز اتے تفصیلات ویب سائٹ پتے موجود ہن۔
.jpg)
