ٻالڑیاں تے تریمتاں کیتے تعلیم دی سہولت تے خاص توجہ ݙتی ونڄے ، وزیر اعظم عمران خان

میانوالی۔24اکتوبر (اے پی پی) وزیراعظم عمران خان ہدایت کیتی اے جو ٻالڑیاں تے تریمتاں کیتے تعلیم دی سہولت تے خاص توجہ ݙتی ونڄے۔وزیراعظم آفس دے میڈیا ونگ توں جاری بیان موجب وزیراعظم اے ہدایت کیڈٹ کالج عیسی خیل اچ نویں ہاسٹل بلاک دے افتتاح دے بعد 19ارب روپے دے میانوالی ترقیاتی پیکیج اچ شامل منصوبیں تے بریفننگ دے دوران ݙتی اے ۔ وزیر اعظم عمران خان کیڈٹ کالج عیسی خیل اچ نویں ہاسٹل بلاک دا افتتاح کیتا، وزیر اعظم پولیو دے قطرے پلا تے انسداد پولیو مہم دا آغاز کیتا اتے ٻوٹا وی لاتا ۔ایں موقع تے وزیر اعظم عمران خان علاقہ خصوصاً خٹک بیلٹ کیتے صاف پاݨی دی سپلائی دے منصوبے دا منڈھ ٻدھیا ۔ صاف پاݨی سپلائی منصوبے دی کل لاگت 3.2 ارب روپے اے جیں اچ 80 فیصد وفاقی حکومت اتے 20 فیصد پنجاب حکومت ݙیسی ۔منصوبے توں3.4 ملین گیلݨ یومیہ پاݨی دی سپلائی ممکن تھی سڳسی ۔تقریباً ڈھائی لکھ آبادی تے مشتمل 87 قصبے 151 وستیاں کوں پاݨی ݙیسی ۔منصوبے کیتے شمسی توانائی دے ذریعے بجلی حاصل تھیسی تے ۔رکھےموسم کیتے 3 مہینے تئیں دے استعمال دا پاݨی ذخیرہ کیتا ویسی ۔ وزیر اعظم کوں 19ارب روپے دے میانوالی ترقیاتی پیکیج بشمول سڑکاں دی بحالی اتے انہاں کوں ݙو پاسے کرݨ ، 46 پاݨی دے سپلائی منصوبیں دی بحالی، تحصیل ہسپتال پپلاں اتے تحصیل ہسپتال کالاباغ دی تعمیر ، 200 بستریں تے مشتمل زچہ بچہ ہسپتال، موجودہ سکولاں اچ 400 کلاس رومز دے ودھارے ، 77 خستہ حال سکول عمارتاں دی تعمیر اتے میانوالی یونیورسٹی دے منصوبیں دی پیشرفت تے تفصیلی بریفنگ ݙتی ڳی ۔

مضمون کا ماخذ : ہیوگو 2

متعلقہ مضامین