اسلام آباد۔1ستمبر(اے پی پی)چیف آف آرمی سٹاف جنرل عاصم منیر آکھیے پاکستان ایہو جیہا خطہ چاہندے جتھاں امن قائم تھیوے، تجارت، ٹرانزٹ تے سرمایہ کاری جنوبی، مغربی اتے وسطی ایشیا دی ساریاں ریاستاں سانڳے خوشحالی دا باعث بݨے۔ اے ڳالھ انہاں اقوام متحدہ دے امن مشن دے وزارتی اجلاس تے تیاریاں دا جائزہ گھنݨ سانڳے منعقدہ کانفرنس دے چھیکڑی سیشن اچ بطور مہمان خصوصی خطاب کریندے ہوئیں آکھی اے ۔ ایں موقع تے وزیر خارجہ جلیل عباس جیلانی وی خطاب کیتا۔ جاری بیان موجب اقوام متحدہ دے امن مشن دے وزارتی اجلاس تے تیاریاں دا جائزہ گھنݨ سانڳے اجلاس اسلام آباد اچ 30 اتے 31 اگست کوں تھیا ۔ امن مشن دے تحفظ اتے سکیورٹی دے موضوع تے تھیوݨ آلے اجلاس دی مشترکہ میزبانی پاکستان اتے جاپان کیتی۔ اجلاس اچ مختلف ملکاں دے مندوبین، اقوام متحدہ دے اعلیٰ حکام اتے اسلام آباد اچ سفارتی برادری دے ارکان شرکت کیتی۔ ایں موقع تے چیف آف آرمی سٹاف عالمی امن دی بحالی اچ اقوام متحدہ دے کردار دی تعریف کریندے ہوئیں امن دستیں کوں پیش تے ودھدے چیلنجز اتے خطریں کوں اجاگر کیتے ۔ انہاں اقوام متحدہ تے زور ݙتے او امن مشن کوں ایں قابل بݨاوے جو او امن مشن تے مامور نینگراں دے تحفظ اتے سکیورٹی یقینی بݨیندے ہوئیں اوکھے خطریں نال نبݨݨ سانڳے مزید موثر تھی سڳے ۔ آرمی چیف سلامتی کونسل اتے اقوام متحدہ دے سیکریٹری جنرل توں مسئلہ جموں و کشمیر کوں سلامتی کونسل دی قرارداداں تے کشمیری عوام دیاں امنگاں دے مطابق پرامن حل دا وی مطالبہ کیتا ۔
.jpg)
