اسلام آباد۔3مئی (اے پی پی) وزیراعظم محمد شہباز شریف عالمی سانجھے داراں دے تعاون اتے ملکی اداریاں دی محنت نال پاکستان توں پولیو دے پورے خاتمے دا عزم کریندیں ہوئیں آکھیا جو خطے توں پولیو دے پورے خاتمے کیتے پاکستان اتے افغانستان اچ تعاون ضروری اے۔ انسداد پولیو مہم اچ حصہ ڳھنݨ آلی ٹیماں کوں پورا تحفظ ݙتا ویسی۔ ملک توں پولیو دے خاتمے کیتے مہم چلائی ونڄے۔ وزیراعظم آفس دے میڈیا ونگ توں جاری بیان موجب اے ڳالھیں انہاں بل اینڈ میلنڈا گیٹس فاؤنڈیشن دی گلوبل ڈویلپمنٹ ڈویژن اتے پولیو اوورسائٹ بورڈ دے صدر ڈاکٹر کرسٹوفر ایلائییس دی قیادت اچ عالمی انسداد پولیو مہم دے وفد نال ڳالھ مہاڑ کریندیں ہوئیں آکھی جئیں جمعے کوں انہاں نال ملاقات کیتی۔ وفد اچ ریجنل ڈائریکٹر عالمی ادارہ صحت ایمرو ریجن ڈاکٹر حنان بلخی، جنوبی ایشیاء کیتے ریجنل ڈائریکٹر یونیسیف سنجے ویجیسیکرا، سنٹر فار ڈیزیز کنٹرول دے پولیو برانچ چیف ڈاکٹر اوموٹایو بولو، پاکستان اچ عالمی ادارہ صحت دے نمائندہ ڈاکٹر لؤو ڈاپینگ، پاکستان اچ یونیسف دے نمائندے عبداللہ فاضل، عالمی ادارہ صحت دے ڈائریکٹر انسداد پولیو، ڈاکٹر حامد جعفری اتے ڈپٹی ڈائریکٹر پولیو بل اینڈ میلنڈا گیٹس فائونڈیشن مائیکل گیلوے شامل ہن۔ ملاقات اچ وفاقی وزیر اطلاعات تے نشریات عطاء اللہ تارڑ، وزیر مملکت شزا فاطمہ خواجہ، وزیراعظم دے کوآرڈینیٹر برائے صحت مختار ملک اتے متعلقہ اداریاں دے اعلیٰ افسر وی موجود ہن۔
