بیجنگ ۔ 14 نومبر (اے پی پی) وزیراعظم پاکستان عمران خان دا ملک توں غربت دے خاتمے سانگے بھرپور مہم شروع کرنڑ دا منصوبہ ہک خوش آئند عمل اے جیں نال ملکی معیشت کوں بہتر بنڑاونڑ اچ مدد مل ویسی ۔اجوکے عشریں دے دوران چین اچ رونما تھیونڑ آلے اقتصادی معجزے دے تحت 800 ملین (80 کروڑ) لوکاں کوں غربت توں کڈھنڑ اچ مدد ملی ،ایں حوالے نال چین اپنڑے تجربے پاکستان نال شیئر کرنڑ کوں تیار اے ۔معروف چینی روزنامے گلوبل ٹائمز اچ شائع تھیونڑ آلی ہک رپورٹ دے مطابق وزیراعظم عمران خان آکھیے جو پاکستان غربت دے خاتمے دے حوالے نال چینی ماڈل توں استفادہ کریسی ۔چین ایں حوالے نال اپنڑے تجربے شیئر کرنڑ تے ضروری معاونت سانگے تیار اے ۔بنیادی ڈھانچے دی تعمیر ملک اچ اقتصادی ترقی اتے غربت دے خاتمے اچ طاقتور انجنڑ ثابت تھی سگدی اے ۔چین پاکستان اقتصادی راہداری سی پیک دا ارباں ڈالر دا منصوبہ بنیادی ڈھانچے دے کئی منصوبیں دا مجموعہ اے جیں دی پاکستان اچ تعمیر جاری اے ۔نویں حکومت دی غربت دے خاتمے دی مہم دے دوران چین تے پاکستان جنوبی ایشیا اچ بنیادی ڈھانچے کوں بہتر بنڑاونڑ سانگے رل تے کم کریسن ۔چین سی پیک دے تحت صنعتی اداریں اچ سرمایہ کاری دے ذریعے روزگار دے ودھ توں ودھ موقع راہم کرتے لوکاں دی مالی صورت حال بہتر بنڑاونڑ تے گھٹ آمدنیدے حامل کوں کوں غربت توں کڈھنڑ سانگے وڈے دل دا مظاہرہ کریسی۔ایندے علاوہ ملازماں دیاں مہارتاں کوں بہتر بنڑاونڑ سانگے پاکستانی عوام نال معاونت کیتی ویسی۔چین پاکستان اقتصادی راہداری دے منصوبے نال پاکستان کوں عام لوکاں دا معیار زندگی بہتر بنڑاونڑ اچ مدد ملی اے جیرھا جو غربت دے خاتمے دی مہم دی رفتار تکھی کرنڑ اچ معاون ثابت تھیسی ۔
