اسلام آباد۔10اگست (اے پی پی) وفاقی وزیر خزانہ مفتاح اسماعیل آکھیا جو حکومت دی موثر حکمت عملی پاروں ملک اوکھ اچوں نکل ڳئے، آندے کجھ مہینیاں اچ مالی صورتحال بہتر تھی ویسی جئیں نال عوام دی اوکھ اچ ڳھٹکی تھیسی۔ ایں ویلھے سری لنکا جیھی صورتحال بلکل کائنی۔ اے ڳالھیں انہاں غیر ملکی نشریاتی ادارے سی این بی سی ایشیا نال ڳالھ مہاڑ کریندیں ہوئیں آکھی۔ انہاں آکھیا جو پاکستان دے سری لنکا جیھی صورتحال تھیوݨ دے ٻہوں ݙر ہئی اتے ملک دیوالیہ تھیوݨ دے نیڑے ہئی، پر اڄوکی حکومت پالیسیاں اچ اہم تبدیلیاں نال انہاں خطریاں کوں ٹال ݙتے۔ مفتاح اسماعیل سی این بی سی دی اینکر دے سوال دا ولدا ݙیندیں ہوئیں آکھیا جو جو پاکستان دے سری لنکا جیھی صورتحال تھیوݨ دے ٻہوں ݙر ہئی اتے ملک دیوالیہ تھیوݨ دے نیڑے ہئی، پر اڄوکی حکومت پالیسیاں اچ اہم تبدیلیاں نال انہاں خطریاں کوں ٹال ݙتے اتے صورتحال تے قابو پاوݨ اچ کامیاب تھی ڳیوں۔ انہاں آکھیا جو اساں آئی ایم ایف پروگرام کر ڳھدا اتے سٹاف لیول دے معاہدے تے پڄ ڳیوں اتے توقع اے جو ایں مہینے دے چھیکڑ تئیں بورڈ دی منظوری وی تھی ویسی۔ اوکھے فیصلے کریندیں ہوئیں تیل تے بجلی تے سبسڈی واپس ڳھݨی پئی اتے ٻئی شہیں تے ٹیکس ودھاوݨا پئے اتے میݙے خیال اچ اساں سدھے پاسوں اڳوں ویندے پیوں۔
