اسلام آباد۔10جنوری(اے پی پی)نیشنل پریس کلب اسلام آباد اتے انٹر بورڈ کوآرڈی نیشن کمیشن وچال مفاہمتی یادداشت تے دستخط کیتے ڳن۔ انٹر بورڈ کوآرڈی نیشن کمیشن نیشنل پریس کلب دے ممبران اتے انہاں دے ٻالاں دی میٹرک، انٹر لیول اتے مساوی اسناد دی فوری تصدیق کیتے فوکل پرسن دی تعیناتی،ٻالاں کیتے کھیݙاں دے مقابلیاں اچ شرکت، سکالرشپس اچ صحافیاں دے ٻالاں کیتے ترجیحی مواقع ݙتے ویسن۔ معاہدے تے این پی سی ولوں صدر اظہر جتوئی ڄݙاں جو آئی بی سی دے ڈائریکٹر ایڈمنسٹریشن محمد منیب جاوید دستخط کیتن۔ آئی بی سی سی دے ایگزیکٹو ڈائریکٹر پروفیسرڈاکٹر غلام علی ملاح آکھیا جو 1972 اچ ٻݨݨ آلے ایں ادارے دا ایکٹ پچھلے سال منظور کیتا ڳیا ہا، اڄ میکوں خوشی اے جو آئی بی سی سی پورے ملک اچ آن لائن ڈیسک ٻݨا ݙتن۔ ادارے دا ون ونڈو آپریشن دے علاوہ شام کوں وی خصوصی سروسز ݙتیاں ویندن، نیشنل پریس کلب نال معاہدے دے بعد صحافیاں اتے انہاں دے ٻالاں کوں اے سہولت ملسی اویں میڈیا آئی بی سی سی دی وی پذیرائی کریسی۔ ایں توں پہلے صدر نیشنل پریس کلب اظہر جتوئی معزز مہمان دے آوݨ تے شکریہ ادا کیتے اتے آکھیے جو نیشنل پریس کلب دی ایجوکیشن کمیٹی این پی سی ممبران اتے انہاں دے ٻالاں کوں سہولت ݙیوݨ کتیے ہر ویلھے تیار اے۔ چیئرمین ایجوکیشن کمیٹی این پی سی عاصم جیلانی آئی بی سی سی نال معاہدے دے نکات ݙسائن جو نیشنل پریس کلب اپݨے ممبران کیتے اگلے مرحلے اچ مختلف پبلک اتے پرائیویٹ سیکٹر جامعات نال معاہدیاں کوں حتمی شکل ݙیسی اتے ایں سانڳے ممبران کوں تیکھے خوشخبری ملسی۔
.jpg)
