شرم الشیخ۔8نومبر(اے پی پی)وزیراعظم شہباز شریف آکھیے جو موسمیاتی تبدیلی دا ٻھار برابری تے نئیں منصفانہ ونݙیڄݨا چاہیدے، اے موسمیاتی انصاف دا معاملہ اے، موسمیاتی تبدیلی دے اثرات سب توں ہیݨے کمزور طبقے تے پوندن، چھل نال پاکستان اچ 3 کروڑ 30 لکھ لوک متاثر تھین، 4410 ملین ایکڑ زرعی زمین دا ضیان تھئے، تقریباً 40 لکھ ٻالاں کوں صحت خدمات نئیں ملدیاں پیاں، جیکر موسمیاتی تبدیلیاں دے اثرات نال نمتݨ دے اقدامات نہ تھئے تاں ڄڳ اچ 2050ء تئیں216 ملین لوک بے گھر تھی ویسن۔ اے قآلھ انہاں ناروے دے وزیراعظم جوناس گہرسٹور دے کٹھے موسمیاتی تبدیلی اتے کمزور طبقات دے استحکام سانڳے کانفرنس دی مشترکہ صدارت کریندے آکھی۔ انہاں آکھیا جو موسمیاتی تبدیلی ایں ݙھاکے دا اہم بحران اے جیندے خلاف ساکون کٹھی بھیڑی ٻھڑݨی پوسی، ودھ خطرے دا شکار ملکاں دا ہتھ ونݙاوݨا ہوسی، موسمیاتی تبدیلی و گلوبل وارمنگ ساݙی منصوبہ بندی توں ہٹ تے تیکھے ودھدی پئی اے، ایں سانڳے ایندے نال ودھ متاثرہ ملکاں کوں مدد ݙیوݨی ہوسی۔ انہاں آکھیا جومسومیاتی تبدیلیاں نال انفراسٹرکچر، جانی و مالی ضیان، مال مویشی دا نقصان، خوراک و زراعت دے مسائل سودھا ٻالآں اتے تریمتیں کیتے صحت دے مسلے اہم ہین جیندے نال نبݨݨ کیتے سائنسی بنیاداں تے ہنگامی اقدامات کرݨے چاہیدن جو اے مسلہ ودھ سر نا چاوے۔
